抖左幾日, 終於可以寫低生 B 既過程.
呢個過程真係好辛苦好難忘 !!
12號朝, 疊埋深水入院摧生, 奇怪成晚個肚既宮縮情況反而少左.
朝早6點去廁所, 嚇見見紅, 一D痛都無, 準備沖涼洗頭落街食餐入院, 不過今朝係最凍既1朝.
9點前入院搞手續, 9點9產前病房醫生檢查後, 原本係見紅變見血囉, 仲話等聽朝塞藥, 心諗唔係嘛, 仲要等 ?
又唔知點解10點就推我去產房人工穿水.
產房地方真係好得人驚. 好多呻吟聲.
等左陣推左入3號產房5號床, 1塊木板之隔已有位太太陣痛緊.
駁好心跳機, 醫生人工穿水, 終於知道穿水既感覺, 有陣好暖好暖既水流出, 真係幾似失禁. 接住種豆吊摧生水, 之後同事講過粒種豆針口勁痛, 姑娘叫深呼吸, 老死大大力深, 感覺真係好似無咁痛.
由10點半開始, 姑娘仲問左我幾次痛唔痛. 感覺良好, 可接受.
隔左1個鐘, 望住個鐘, 隔2分半就痛, 開始"那住那住".要聞笑氣.
再隔1個鐘, 痛楚加強, 要求打止痛針, 點知打左唔夠 15 min, 將朝早早餐嘔晒出黎, 仲成面成頭成身都係.已經暈拕拕,嘗試第一次放尿.
跟住個3個鐘. 宮頸口已軟化勁勁勁勁痛, 狂吸笑氣, 吸到滿天星豆, 姑娘仲叫我無痛時要停吸. 不過我發現到痛個刻至吸, 係無料到.
接近黃昏,醫生檢查, 已4度. 老公搵我.不過已經好痛, 唔想講電話.
隔左半個鐘, 勁急, 唔知急D 乜, 只係知道下面勁急, 狂問姑娘開左幾度, 好想屙, 好想屙, 姑娘係咁易檢查, 又話未得, 就得喎, 忍耐多陣.
又再等多1個鐘, 醫生檢查, 已7度, 仲話差唔多. 不過已經頂唔順, 用左幾次力去屙, 仲比姑娘鬧.
無耐, - 姑娘開始準備, 仲搞點用力, 又勁比姑娘鬧, 用錯力, 姿勢唔啱, D 力唔夠長, 又呢樣個樣, 仲 Call埋醫生, 知自己勁無儀態, 個刻淨係想快D 屙屙屙.....醫生姑娘成 6,7 個企晒我面前等我生, 又話我咁樣生唔度喎, 又話我無盡力,個刻好想喊, 好妥屈咁.
用左半個鐘, 我既寶貝B終於出左黎,臍帶都未剪已經扒左係我肚度, 個刻 Feel到有舊暖冧冧既嘢.
BB磅重, 有 3.51 kg, 放去保溫箱前問我男定女,醫生姑娘準備幫我聯針, 仲話我未夠度數時用左幾次力去屙, 搞到宮頸口爆左少少. 局部麻醉, Feel 到扯線感覺, 好彩仲有笑氣聞.
係產房仲要逗留個幾鐘, 呢刻淨係望實BB 個樣, BB 眼碌碌周圍望, 而我要記住記住佢個樣.
入產後病房, 但BB仲係保溫箱, 低B既我仲問BB點解唔跟埋我一齊走.
感恩用左 9個鐘生左 BB 出黎, 感恩可以順利順產, 隔壁床既媽媽因開刀, 成晚傷口痛, 呻吟聲叫左成晚, 好可怕.
第1晚係病房渡過, 基本上無瞓過. 左邊呻吟聲, 右邊擋豬聲.
生完 6小時內一定要屙第1篤到尿, 否則要放尿,幾勁辛苦迫自己屙.
12小時後, 無見頭暈可落床, 待醫生巡房後, 勁心急想抱BB, 10點半去嬰兒房接BB, 好可愛 !! 第1次抱初生 Baby, 感覺好得意.
對左 2個鐘後, 放回嬰兒室暫存, 去廁所洗傷口, 點知坐底起身, 見頭暈, 滿天星, "Bom " 1聲 ~ 成個人坐係地度, 頭撞廁所門, 個刻成個人醒晒, 禁救命鐘, 姑娘扶埋床, 要困床, 唔準落地, 連BB都末收.
探病時間, 媽咪老公只可係隔玻璃望BB, 由於暈倒, 姑娘醫生勁緊張, 又做呢樣Test 個樣 Test, 抽血量血壓, 第2晚都唔駛我餵奶.
住院第3日, 瞓左一晚, 感覺好左, 嘗試落床坐床邊, 醫生巡房後, 終可接BB同出院喇~
沒有留言:
發佈留言