◣我家◕｡◕じ寶貝◥: 家希0-①Year

顯示包含「家希0-①Year」標籤的文章。顯示所有文章

2011年1月12日星期三

【生日快樂 @ 1 歲生晨】

1.12............家希已經1 歲喇~ 時間好似眨吓眼咁禮拜日搞左個小型生日會, 簡簡單單o益左家姐細妹上黎order Pizza,KFC 返黎食, 因為舅父仔業餘係整蛋糕, 而家 order多左, 所以我都早成半個月叫定舅父仔整左個3D蛋糕賀家希1歲生晨, 祝家希快高長大, 健健康康, 聽聽話話, 唔好咁激心就得架啦同埋做個有用既人.

個蛋糕真係好靚...舅父仔手工真一流!

2011年1月11日星期二

【半歲後1歲前大回顧】

【BB ♥ Lai @ 7 Month】
吽左幾個月牙仔, 終於見到個窿, 完全好似d人 mook 完牙, 淨番個窿咁. 好奇妙呀 !!

2011年1月10日星期一

【辛苦 Mama 】

禮拜六家希第一次嘔 (唔計嘔奶), 足足嘔左成碗粥, 搞到成身都係.....

之後直至今日, 連繼發燒, 又升又降, 最高可以去到39幾.

2010年9月27日星期一

【生病了】

忙左幾日, 繼煩家事同時家希又病倒了~~~

自家希3個禮拜大時睇過醫生後, 直至而家真真正正生病.....

無拿拿發起燒, 仲諗住退左燒就安樂喇~

點知兩堂鼻涕不停流加埋咳 !

而家幫佢抺, 又唔比我抺, 唔知係咪痛痛哩 ? 梗係啦, 佢成日自己卒, 又唔就力, 實比佢自己卒損左都似. 但唔抺, D 鼻涕乾左痴住咪仲辛苦.

呢2個佢脾氣好差, 成日都好忟, 我估佢梗係覺得個鼻好唔舒服, 所以成係咁周圍打. 同時比我發現佢第3 & 第4隻牙仔已經標緊出黎啦.....

2010年7月24日星期六

【乙型肝炎 + 四合1 + 肺炎鏈球の第3針】

又到打針既日子, 今次揀左 Saturday, 仲要晨咁早 9 點, 家希起身都成 8 點, 搞得呢樣個樣, 最後遲到 45 min, 仲比姑娘話....遲到要再約過, 好彩 10點半有位比我攝, 下次都係揀番 Friday既晏晝, 時間容易 D就.

去到健康院, 婆婆又同其它Mama吹水, 問吓人地個 B幾大, 雞啄唔斷. 其它6個幾月既B, 真係大件好多. 好聚手, 人地既B撩家希玩, 唔知係咪眼瞓, 唔睬人不得止, 仲發老皮.

6個月多D得7.49kg, 即係16.4磅, 係mama心中, 家希仲係好奀, 護士長就話跟家希出世至今屬正常. 一定要分 Size, 就屬中型偏瘦.

都係個句, 最緊要食得瞓得同玩得. 個個BB發展都唔同.

身長 70cm 頭圍 45cm

做左少少 Test, 比件玩具家希, 但佢淨係用單手渣住, 仲要唔多想渣個隻, 平時响屋企嘈嘈閉既表演完全收埋, 所以9個月大要再黎多次, 咁都好, 可以磅吓幾重, 哈哈 ~

入房打針, 呢個家希好似知發生咩事咁, 婆婆話佢成個人彊硬晒, 拮落去第一支針已經標晒眼淚, 再拮多2支, 唔駛講, 梗係喊到拆天加上扭眼瞓, 抱左陣就瞓著左.

今呢3支針, 唔駛係咪勁得沛, 家希前後發左 3次燒.

2010年7月12日星期一

【BB ♥ Lai @ 6 Month】

話咁快家希就 6 個月大, 即半歲喇 ~

仲記得初初湊住呢個家希, 真係好辛苦, 24小時stand by, 不眠不休, 湊一個 Baby真係唔易 !

家希而家可以食晒成1碗粥仔, 每日keep 住有 4餐 180ml 奶奶 + 蕉仔, 日日有吾吾, 非常good !

2010年7月11日星期日

【半歲前大回顧】

【BB ♥ Lai @ 0 Month】
出院第二日, 第一次同家希沖涼.

12 朝家希仍然最愛瞓覺.

【BB ♥ Lai @ 1 Month】
1個月, 表情多多

1個半月, 大件左好多.

【BB ♥ Lai @ 2 Month】

家希2個月, 已經比1個月前梗硬淨. 仲識好多嘢添 !!

片片濕左識得話我地知, 又識得用口推開個奶樽, 有陣時仲懶得推開, 照擘大個口, 唔啜, 由得D 奶奶 or 水水係口邊流走.

瞓覺前要人抱抱至乖乖入睡. 閒時無嘢做, 都要有人坐係佢視線範圍, 如果唔係會大叫.

仲識得望公仔添 ~

2010年5月21日星期五

【一撻撻紅】

都唔知搞乜鬼, 梗係日日有新鮮, 早前煩緊吾吾, 之後為轉奶粉煩惱, 然後pat pat 罅 keep 住紅既問題. 而家又到塊面喇~

家希咀仔四邊, 搞乜嘢, 一撻撻紅, 成個烏咀狗. 好樣衰 !!

又似癬又似敏感, 頸仔摺住又有一撻, 耳仔邊又有, 連膝頭罅都有, 鞋鞋 + 有少少甩皮, 究竟係乜傢伙. 背脊腰位又有紅點, 係咪轉用左 Huggies, 太高身, 焗住條腰呢 ? 但係都用到最後2塊喎......而家至有問題 ??

2010年5月20日星期四

【四合1 + 肺炎鏈球の第2針】

4個月多D, 家希又要到健康院左右肶捱 2 針.

頭圍 42cm, 身長 66cm, 體重 6.62 (14.5磅), 頭仔大左2cm, 身都長左 6cm, 但我覺得個體重較輕左.

今次呢個姑娘, 個人應為, 學我老細話齋, 可以再做好D. 態度唔係差, 只係唔 Nice 囉, 問多句都好似唔多想咁.

循例都係問我有無咩想問, 我梗係想問吾吾呢個問題. 答案都係一樣, "只要吾吾係軟身" 2日1次都無問題.

不過比佢話我沖奶既方法唔啱 !! 一向沖奶, 我都會另多加 10ml 水, 姑娘話咁樣唔得, 一定要跟足份量. 又話餐與餐比水BB飲, 唔好多, 只係濕吓口就好.

2010年4月24日星期六

【100 Day】

4 の 22, 家希 100日大.

心血來潮, 想買左 Cake , 但美❤ 聖記至少要 2磅, 我地 3個人又點會食得晒. 諗起細佬而家搞緊幫人整 3D Cake, 前1晚拿拿林打比佢, 搵佢幫手, 整個半磅 Cake. 好開心可以趕得切正日攞番返屋影相相 + 切蛋糕.

祝家希快高長大, 身體健康 !

2010年3月27日星期六

【第一次發燒】

一直都擔心四合一 + 肺炎鏈球菌既副作用, 最唔想既事真係發生 !

由尋晚起, 家希已經無晒胃口, 原本 6安奶變成 4 安, 其中有餐仲飲得 1 – 2 安添 !

臨瞓前用奶樽餵開退燒水餵佢飲, 好彩家希都肯飲, 可能味道溝淡左. 之後半夜頻頻起身比家希飲水水 + 探熱 ! 成晚 Keep 住 37.1 - 37.5

今朝最高去到 38.2, 試用針筒餵餵退燒水, 係咪太 "結", 佢係咁哇番出黎, 最後仲連d奶都嘔埋. 搞到雞手鴨腳 !

呢隻寶貝豬成個樣 down 晒, 心痛死 ! 拿拿林幫佢貼退熱貼, 好似無乜料到. (唔知係咪我無雪响雪櫃呢 ?)

2010年3月26日星期五

【四合1 + 肺炎鏈球の第1針】

2個半月既家希, 頭圍有 40.2cm, 身長 60cm, 體重 5.72 (12.5磅), 姑娘話屬中型 BB, 成長得唔錯 ! 計起上黎, 2 個幾月已經比出世重左 4磅 8 喇 !

見完姑娘就準備帶家希到隔壁房打四合1 + 肺炎鏈球疫苗第 1 針! 一次過要打2支係各左右肶度.

上次因為掛住影相, 今次真真正正睇住家希比姑娘桔完左邊再桔右邊, 睇見家希捱左第1針時, 個樣又白變紅, 喊得好痛咁, 條氣都未順就要捱多針, 嘩~ 個o下個心真係有D up up 地, 好陰公!!!

好彩係我亞媽抱住, 幫家希禁實, 所以佢淨係喊左幾下就收聲, 跟住只係嗚嗚嗚聲咁叫....好似想話比我地知, 嗚嗚...好痛好痛...嗚嗚 !

2010年2月24日星期三

【媽媽VS家希の大比評】

望住呢個仔, 每日都好開心好滿足. 摷番自己童年照, 同家希B有幾分相似咁喎, 都話家希似媽媽多過Papa 啦.

今日同家希著2件頭, 即刻變左大個仔.

2010年2月18日星期四

【乙型肝炎第 2 針+ 辦妥出世紙】

湊 BB ♥ Lai 終於有佢既名字 lu ~ ※※ 黎家希 ※※

呢個名係佢 Papa 改, 意思係我地黎家既希望.

由於中午要去健康院打針, 又要同 BB沖涼, 所以辦理出世紙既任務交由老公負責.

2010年2月11日星期四

【BB ♥ Lai 滿月】

終於到滿月既日子, 同時我唔駛再閉關又可以光明正大用花灑沖涼洗頭 Lu.

媽媽整左堆紅雞蛋.

2010年2月10日星期三

【BB ♥ Lai 滿月前回顧】

BB ♥ Lai出世已 1 個禮拜, 湊B 日子真係好辛苦, 每日淨係餵奶換片掃風沖涼, 基本上所有時間都放晒係BB 度.

仲要有2粒痣倉跟埋 BB ♥ Lai 出現, 搞到心情好差, 好痛好痛.又去唔到廁所.

今日終於好番 D, 有番少少精神, 終於可以上一陣網 Relex 吓.

盡量每 Day 都會幫 BB 影相, 第時可以整番個相冊.

2 個禮拜既湊B 生涯, 比起初初已經習慣左好多, 至少粒痣蒼好番, 可以正式投入湊B 日子.

由初初 2 個鐘到而家可以 3 個鐘至餵一次奶, 起碼我可以有 2 個鐘休息時候.

2010年1月29日星期五

【公司's Gift】

由於 BB ♥ Lai 過期居留 6 Day, 原本放前 2 後 8 既我, 仲要再放多 6 Day 至可以返工.

尋日終於同 HR 個邊傾好個 6 Day 用 No pay 定 A/L, 最後可以比我用 A/L 代替, 仲要著情地計 Working Day, 即係扣我 4 Day A/L 就得.

原本話送花籃, 點知變左生果籃 !