【燒不停 の 5日4夜 】

禮拜三晚,  夜媽媽, 收到婆婆電話, 都知唔會好嘢.

家希發燒, 唔通去完撓蝌蚪搞到病.

仲要唔止發燒咁簡單, 腳上仲出左好多粒類似蚊「喇」既紅點,  即刻就唸起, 會唔會因為婆婆屋企個D 蚊滋架.

第二朝請假拿拿林倒塔咁早去湊家希返入黎睇醫生.

雙腳起晒紅疹, 醫生又話呢個歲數唔會係玫瑰疹,  暫時覺得係風「喇」


食過藥, 終於安頓好佢.


瞓左4個鐘, 一起身, 成身係滾既, 探熱嚇見40.1度.
咁耐以來, 第一次咁高燒, 搞到Mama 我手都震晒拿拿林拎退燒水比佢食.

食藥已經唔再搏鬥, 可以自動波.

成晚d 燒反反覆覆, 差唔多藥力過, D 燒就返黎, 仲要一黎就38.7度以上.
又無咳無鼻水. 又食得玩得, 同平時無乜分別.

成晚都不停探熱, 仍保持燒燒燒.

第二朝, D 燒仍唔退, 又係 Keep 住高燒.
未夠7點, 揸車去港安.

真係唔好彩, 撞正人地有急症要搶救, 等左成粒鐘, 終於到我地.
建議入院做檢查, 但又無床位. 即癈話喇.

拎藥返屋企抖下.

再燒多一日, 已經第三日. 一早起身, 呢個仔已經腫口腫臉, 究竟係燒既問題, 亦或係瞓醒未消腫.
今次去左屯門急症.

見到佢咁既樣, 心都Up埋. 總算好, 起碼佢仲肯食嘢.

屬次緊急, 等5個就到我地.

即被安排入院照X-ray
兒童病房, 要帶住呢條防盜器

呢個仔, 估唔到佢真係好乖好叻, 抽血, 鼻同喉嚨分秘都無喊過無扭計.

成間病房, 4個小朋友, 最精神果個咪係家希, 一聽到隔離床位既小朋友喊, 就懶醒話好嘈呀.
醫院餐, 好胃口, 一碗飯可以食淨1/3.

又成日走黎走去. 呢度睇下個度睇下.
如果唔係發高燒同出紅疹, 真係睇唔出佢病囉.

醫院只會燒到38.5以上先至比藥.
好彩我地Keep 住幫家希探熱, 等佢地黎探, 蚊都瞓.

不過平時我都係39度至會比退燒佢食, 兒科醫生話, 有少少燒可以係身體內消毒緊.

一去到39.1度, 比佢食過藥係時候要瞓下.



繼3年前家希出世後, 今次再一次要留係呢度過夜.
响醫院瞓真係無覺好瞓. 成晚d 燈又開又熄, 因為有新症囉.
再唔係呢個B喊就果個小朋友喊.

家希總算瞓得著. 而我就慘喇. 坐又點瞓喎. 老公返屋企瞓左幾個鐘, 半夜2點返黎同我調更.
等我可以返屋企瞓番4個鐘.

醫院其間, 我地每半個鐘都同家希探熱又Mark 埋時間度數, 自我觀察,
係呢度, 基本上得退燒水, 其它藥無比過.
佢地既藥水4個鐘1次, 食完基本上係唔會退晒, 只係保持38度. 即係仲燒緊.

燒到第4日, 即係瞓左醫院1晚後, 醫生巡房, 
報告全正常, 起碼唔係流感先. 初步係病毒感染. 高燒引起風「喇」
仲話病毒感染係無藥食. 要靠佢自己抵抗力好番喎.

繼續留係度, 都只係觀察. 等佢自己退燒.

對我黎講, 仲要留係咁嘈吵既環境又無藥可食, 真係好痛苦.

最後我決定簽紙出院, 要觀察倒不如留係屋企觀察, 起碼家希可以瞓得好先喇.

無好好休息, 又點靠抵抗力自己好番喎.

出左院食番之前兒科醫生既藥. 今次食左退燒藥過左4個鐘, 再4個鐘, 再瞓醒第二日都無燒番.

睇黎燒左4日, 佢真係靠自己抵抗力好番.