BB ♥ Lai出世已 1 個禮拜, 湊B 日子真係好辛苦, 每日淨係餵奶換片掃風沖涼, 基本上所有時間都放晒係BB 度.
仲要有2粒痣倉跟埋 BB ♥ Lai 出現, 搞到心情好差, 好痛好痛.又去唔到廁所.
今日終於好番 D, 有番少少精神, 終於可以上一陣網 Relex 吓.
盡量每 Day 都會幫 BB 影相, 第時可以整番個相冊.
2 個禮拜既湊B 生涯, 比起初初已經習慣左好多, 至少粒痣蒼好番, 可以正式投入湊B 日子.
由初初 2 個鐘到而家可以 3 個鐘至餵一次奶, 起碼我可以有 2 個鐘休息時候.
BB ♥ Lai平時都好少扭, 尤其朝早至晏晝, 飲完奶就會覺覺豬, 仲要瞓得好冧.
至麻煩係夜晚臨瞓前個餐奶, 飲完眼光光, 又唔願瞓, 又要係床度扭黎扭去, 搞成2 個幾鐘就啱啱好又到下餐奶, 真比佢玩死 !
呢排天氣凍左, 又怕 BB會凍親, 2件衫 + 背心仔再蓋埋被, 但唔知點解有幾次佢背脊都濕晒, 初初仲以為漏尿, 但今日至發現, 原來係BB出汗.
BB 出世個刻有 3.51Kg, 餐餐 2 安奶, 6日唔知收水未都有 3.57Kg, 10日就 3.62Kg, 不過醫生話體重唔達標, 由 2 安奶轉到 2安半 ~ 3安, 13日就有 3.74Kg.
而家 25日大既 BB ♥ Lai, 飲奶要飲 4安, 已經有 5KG, 嘩~ 有成 11磅, 日日對住真係唔多覺重左喎 !
老公尊登係公司拎個磅返黎同 BB 磅, 睇見 BB 瞓係個沖涼盤度, 定一定, 好搞笑 !!
BB 出世以黎, 今日係第二次凍, 住新界區既我地, 凍上加凍之餘仲要落埋雨.
因為 BB 滿月係年廿八, 老公未必攞到假, 所以提早今日 (年廿四) 返嫲嫲度拜祖先.
考慮左成朝, 返定唔返 ? D 人又話做滿月做早唔做遲, 最後著到厚厚 Call 的返嫲嫲度.
橫掂去開屯門, 帶埋 BB 去睇兒科, 因為 BB 呢排日抖唔願瞓, 眼光光成 8,9個, 唔知係咪奶粉唔啱, 加埋成日聽到 BB抖氣怪怪.
醫生話 BB 粒粒係油脂粒, 遲D 會消, 至於唔願瞓, 有好幾個可能, 可能抖氣唔舒服, 可能肚仔有風, 的而且確, BB 成日放屁屁. 而抖氣問題, 係有鼻敏感, 唉~ 最唔想係呢樣, 每日已經做好清潔, 又將 BB & 貓分隔. 不過上次健康院醫生又話 1 歲以下既 BB, 呢D 唔會叫鼻敏感, 都唔知信邊個好.
原本打算D藥埋擺一邊, 此終 BB 得個廿幾日人仔, 唔係太大必要, 唔多想比佢食藥.
點知返到屋企, 成晚扭計喊不停. 抱佢, 比奶咀, 比水水, 比奶奶, 換片片都搞唔掂, 仲喊得有咁大聲得咁大聲, 口都震晒, 今次喊聲同平時個D 唔同, 睇見到心痛心煩無奈, 用盡方法都唔得. 媽媽一個來電, 搞到連自己都喊埋一份 " 仲話湊BB邊有咁易, 你估湊貓咩 ? "
最後老公話不如比佢食藥啦, 見佢鼻塞塞, 大人鼻塞都辛苦, 何況 BB. 原本仲驚BB 唔肯飲, 點知見佢飲到 lam lam 味, 好似好好味咁. 飲完藥 + 奶, 真係瞓得好冧, 抖氣好似無咁塞.
老公知我辛苦, 決定聽日响我亞媽入黎前, 拎半 Day 假陪我一齊湊亞 B.
沒有留言:
發佈留言