個蛋糕真係好靚...舅父仔手工真一流!
婆婆仲煲埋老火湯 ~ 西洋菜湯, 下火喎 !!
家希收到好多禮物
1歲人仔越黎越識嘢, 唔鐘意唔滿意唔合心水就發脾氣踢晒腳, 脾氣真係臭都爆, 呢點真係似足 mama 我, OMG ....真慘 !!
係屋企就巴巴閉閉, 多多嘢講, 無時無刻開心就尖叫唔鐘意又大叫. 最鐘意係地下都爬, 一落地第一時間沖去電視櫃摷嘢.
發展方面都幾好, 成日用手指篤D會出聲既嘢.
連我部Iphone, 佢都識得篤, 厲唔厲害
仲未識行路, 扶住嘢又企又踎就好叻.
相信過多2-3個月, 應該可以識行識走.....
電視播d細佬仔廣告 or 輕快音樂, 家希就拿拿林企定定拍拍手, 最好笑連做新聞前既國歌, 佢都會站起來拍拍拍..真係笑屎我.
見我地 "Poo" 口水, 佢就即刻跟住做, 學嘢真係快脆
講 Da..Da..係最叻叻. 人地話佢係發緊音喎.
次次扭計肚餓就識得叫 Ma..Ma..其它時間都係叫 Da..Da., 引導佢叫番Ma...佢就回應我 Da..激死
仍然係為食貓. 次次見親我地食嘢, 梗嘈嘈閉要食埋一份.
最正係餵家希飲奶食粥都無難度, 唔駛10分鐘就KO, 但同佢著衫包片就最苦. 郁黎郁去, 著極包極都唔得, 每次拎要諗計仔, 拎d雜物分散佢注意, 不過唔係次次work.
每日好規律有定時小睡. 咁就變相係我地既自由活動既時候, 哈哈好明顯家希同幾個月前有唔同.
見到生保人唔再扁咀喊. 識得匿埋我地後面又或都扯住我地隻腳扮怕醜
牙仔由10個月到而家一樣keep 住8隻. 仲周不時捉住我地隻手黎咬, 搞到有一個個牙印架, 真係痛死人.
婆婆幫家希剪左亞旺頭, 個樣即時變得幾傻. 每次叫佢亞旺, 佢會傻笑.
呢個1歲人仔, 越黎越大膽, 成日做埋D高難度動作, 有幾次幾乎由架戰車擒出黎, 睇少眼都唔得.
回顧1年前
★ ☆ ★ ☆ ★ ☆ ★ ☆ ★ ☆ ★ ☆ ★ ☆ ★ ☆ ★ ☆
回憶番家希由New born 既 baby, 經過呢1年既時間, 漸漸長大了 !! 可以親身經歷家希每樣新事物既第一次. 感覺好奇妙.....
Day one 去到滿月, 短短一個月已經唔同晒樣.
仲記得初初同家希沖涼都雞手鴨腳, 而家.....已經無難度lu.
家希 100日, 仲記得佢仲係軟綿綿. 又係叫舅父仔臨時臨急整 !!
5個月大, 第一次成功反身.
接住第一次食糊仔,第一次坐得穩,第一次站起來
第一隻牙仔出現喇~ 睇住D牙仔長大, 好似種花既感覺, 每日長一D長一D.
第一次參加麥當當生日會, 第一次真正病倒了, 慘慘 !!
第一次帶家希呢度去個度去......短短3個月, 已經去過唔同既地方.
沒有留言:
發佈留言