【BB ♥ Lai @ 6 Month】

話咁快家希就 6 個月大, 即半歲喇 ~

仲記得初初湊住呢個家希, 真係好辛苦, 24小時stand by, 不眠不休, 湊一個 Baby真係唔易 !

 

家希而家可以食晒成1碗粥仔, 每日keep 住有 4餐 180ml 奶奶 + 蕉仔, 日日有吾吾, 非常good !

轉身已經對家希易如反掌, 想反就反, 攰就反番轉抖抖再黎過, 次次食飽飽都要捉住家希抱一陣, 如果唔係, 佢又會反, 一反又嘔鬼d 嘢出黎. 另外家希仲可以自轉, 想去邊個方向, 就搵塊臉幫一幫, 擦一擦就由頭轉去尾.

 

痴身.....發現家希比以前更痴身, 唔一定要抱佢, 最緊要係坐係佢隔離, 陪住佢就得, 就算行開洗隻手, 佢都 v 嘩鬼叫, 由大叫變尖叫再變為大喊, 搞到成臉都係眼淚. 但係行番埋佢身邊, 佢就即收聲, 話都無咁快.

 

而家學緊坐, 放係梳化cover位, 可以坐定定, 不過要昅住, 因為佢坐坐吓會向前蹤.坐起來會好開心拍手拍腳, 好似想話我地知...."我識坐喇~, 我識坐喇~" 有陣時會放佢係餐椅度坐, 眼前一大堆玩具, 玩到入晒神, 又係咁狂拍, 暴力都不得了.

秤住家希企起來, 佢個咀都會咪咪咀笑, 接住會尖咀, 好興奮咁.

學講嘢, 唔止ee丫丫咁少嘢, 會大聲尖叫同ka ka 聲, 有時玩得開心, 叫得好尖. 連貓貓都怕左佢.

近排成日Bu 口水, Bu 到一個一個口水波.

估計而家係吽緊牙, 蓬捉到既嘢, 第一時間係放入口, 咬咬咬....