【歲半針@健康院】

隔左半年,  又到歲半返健康院打針, 打埋呢支要等到小一至有針打.

今次由悲慘城市轉去屋企附近既健康院.

反而唔會唔多新移民, 估唔到呢度D姑娘好好人, 相比
悲慘城市個邊, 呢度簡直叫做有Service 囉.

歲半家希有9.6 KG, 得21磅, 唔算肥仔.

今日去到見到D 小朋友應該係同家希差不多, 個個都識行識走.
小朋友就最鐘意望小朋友, 家希唔例外, 仲人地跳學人跳, 但又唔識跳,笑死人.

磅完重等叫名見姑娘.

家希各樣發展都OK, 歲半要做個小型Test, 要將幾舊積木疊起來, 見佢係 PG 時唔多玩, 仲以為佢唔得, 點知姑娘叫佢放上去, 佢都可以做到. 符合評估.

由於家希仲未可以講到單字, 所以2歲要返多次健康院見姑娘.

之後姑娘又講起以下呢幾本書仔. 諗番起對上個次係個間死人健康院, 我搵唔番有呢幾本書仔, 個臭串姑娘仲叫我自己上網睇番.

今次呢度好好人. 話比番我, 仲比埋第四同第五. 講到小童發展到6歲架. 真係要好好保存.

接住就去打針, 今次係Mama 我第一次單拖家希去健康院打針, 又要推車仔又要顧住個手袋, 仲驚緊唔知自己撳唔撳得住家希, 歲半人仔, 識反抗丫嘛.

 

好彩最後都順利完成, 平時打完出得間房就收聲, 今次打完仲喊幾聲, 明顯係向我詐嬌.

 

去完健康院, 個天都黑晒, 都係拿拿林返屋企穩陣D.

Tea time 開左杯雪糕杯, 家希更要分一杯匙, 當然係Mama 一大啖, 家希一少啖啦.

 

話咁快食完, 條友仔又點會罷休, 洗乾淨隻杯咪比佢當玩具玩囉. 睇佢幾開心就知啦!!

 

 

仲學人扮食添.

 

 

玩完就拎Mama 部唉瘋玩, 我同家希講, " 喂丫 ! "

咁佢就會將會電話放係耳邊.