【 Day 1 - 3 ✎ 新生適應班】

話咁快就到8月尾, 一連3日既 K1適應班由今日開始.
校服可以唔駛著.  時間由09:15 - 10:30am.

而我就同平時返工無分別, 7點就要出門, 要成個幾鐘既車程至去到婆婆度, 鬼叫我住咁遠咩.

瞓醒無耐既家希, 仲係腫口腫面.

Papa 叫佢做個 V 手勢影張相. 唔知係咪怕面懞既家希, 成個人生硬至於, 個V 手勢睇佢放得幾低.

 
Day 1

8點幾去到婆婆度, 呢個家希仲灘係床度唔願起身. 淨係唔夠1個鐘時間, 又要食早餐又要沖涼, 真係趕到死.

好彩學校係屋企附近咋, 如果唔係真係趕到甩頭甩肺.

預早左10分鐘到學校.
適應班分左5班, 每班15人.

家希被分去第3組.

拎左名牌就入課室, 老師好熱情介紹就隨手拎左盤玩具比家希玩.



家希見到LEGO 都不知幾咁開心.



頭10分鐘係分享時間, 每張枱至少有2個小朋友,等佢地可以Share一齊玩玩具.

齊人就開始點名.

之後就排隊去洗手. 第一次排隊, 情況混亂, 家希仲拖到我實一實.



接住茶點時間.
食飽飽, 排除出大堂做體能.

係 Playgroup都玩過既快樂傘. 家希勁Enjoy.


不過做體能擺動身體就呆呆企定定, 只係一味望住人做

好快就落堂. 總括黎講. 一開始唔駛10分鐘, 家希已經主動同老師講嘢.
係講埋d 九唔搭八既嘢.


Day 2

照樣預早10分鐘到學校.
今日點名, 家希都肯自動舉手, 但隻手舉得勁低.

又係排除去洗手, 今日第2日, 家希可以唔駛拉實我. 不過一路行就一路擰轉頭黎搵我.
好似驚死我走左去咁.



茶點食蛋糕仔.家希就不停問點解唔係尋日既茶餅喎


出日前淨係飲左支奶.
茶點時間, 總算食晒成件蛋糕, 可以頂下個肚



接住係唱遊時間.

小朋友坐一邊, 家希坐另一邊. 總係有幾個小朋友要釘實媽媽.

可能家希有上開PlayGroup, 所以佢呢Part ok, 肯自己坐.

突然, 家希被人狂吻左一下, 呢個家希勁抗拒, 仲一手推開人地同抺自己塊面, 真係好好笑



開始唱遊, 仲唱家希熟識既太陽伯伯.
不過家希淨係聽, 無跟住唱.



又係時不時擰過頭黎望我.



再唱大開雪櫃, 家希仲大大聲話要薯片.

再玩火車捐山窿, 唔係太明白點解家希死都唔肯踏住前面小朋友既肩頭囉.



再坐番埋位. 小朋友都好留心聽老師講嘢



有時見家希d 反應, 起碼佢肯出聲. 我都好安慰



有小朋友喊, 家希仲大大聲聲話, 有人喊呀~ 真係八卦公一名.

第2日總括. 老師多次主動同我傾計, 仲話家希表現似有返N 班. 好淡定.

由歲半開始係Starting Blocks 度上PG, 之後去左CPDA 都仲係喊飽, 黐到我實一實, 後來去到方Sir開始有進步, 再去點叢虫同埋而家創意畫室, 已經可以自己一個人上堂. 响呢年半黎講, 我都睇得出家希有進步左好多.

同埋話佢好主動講嘢.
 

Day 3
今日點名, 手仔可以舉過頭. 叻仔.

圖工活動. 穿飲管. 無難度.



成功自己穿好一條花花錬.



又到排除洗手



今日各人都有好大進步.
終於見到條隊喇 !



接住係茶點. 由於學校係基督教. 所以開動前, 個個都要祈禱.



食完個個小朋友都要自己執嘢.



之後到故事時間.



呢3日適應班, 家希既學習表現記錄.
希望到下個禮拜正式開學, 家希都有咁好既表現就好喇~~~