【試堂@ Starting Blocks】

確實覺得家希呢幾個月黎識嘢多左, 雖然未必明晒我地講乜, 但多唔少都明dd 咁.


怕生保情況未算改善.

見d BLOG 友既小朋友都Join 左呢d 幼潛, 反應幾好, 好想帶家希去玩吓. 希望會有幫助.

多得 BLOG 友大少爺FUFU 幫助之下, 我可以Join 到呢堂試堂. 由於係星期六, 老公又要返工, 而我就膽粗粗咁一支公帶家希由屋企山長水遠出佐敦.

已經朝咁早8點起身準備, 又要煮粥仔又要執好家希行裝, 而mama 自己又要梳洗裝扮. 又要等埋家希屙吾吾, 點知等了又等...夠晒鐘都未有吾吾, 又要趕住同家希換衫換片, 呢條友仔又唔合作, 拖了又拖, 仲諗住自己可以搭輕鐡轉西鐡去添.....最後都趕唔切, 要call 街Van. 唉~~

本來一心諗住早少少去到, 比家希 Warm Up 吓, 好唔好彩又塞車. 塞完屯門公路又塞柯士堅道. 趕頭趕命, 啱啱12點去到, 雖然個度好多小朋友, 由於家希啱啱瞓醒, 矇查查咁, 全程鉗實.

入到課室, 家希仲係一係隻蟹, 鉗住我實一實, 導師姨姨埋黎打個招呼都唔得, 即擰歪臉扁咀大喊. 真失禮晒.

導師姨姨仲話唔好迫家希, 仲話越迫佢只會增添佢既壓力. 由得佢, 等佢 Warm Up 吓, 到佢覺得ok 時,自然就會玩. 所以我都由得家希鉗住我, 只係响佢耳邊同佢傾計唱歌, 等佢快D releax.

一班最多只有6個小朋友, 今堂試堂只有5個, 其中2個仲要係龍鳳 B架. 呢堂D 小朋友全都係1 - 2月出世.

其實我都唔係太記得成個流程. 印象中係....

每個小朋友都有張凳仔, 如果可以就比佢地自己坐, 由於家希變左隻蟹, 所以導師姨姨叫我比家希坐係我大肶就ok.

點名舉手, 當然家希唔肯啦, 只係眼都唔眨咁望住..

之後拎條紅閃閃既布, 收埋d 樂器玩具比每個小朋友摸吓, 輪到家希就即擰歪塊臉.

吹Bubble, 等每個小朋友練吓平衡嘗試去掂.頭2次家希都唔肯去掂, 再吹多幾次, 家希終於肯伸身去嘗試掂.

玩左差不多20 min, 家希開始放鬆, 我嘗試將家希由我大肶轉移凳仔, 佢都ok, 唔抗拒, 當導師姨姨比玩具, 家希都肯伸手去拎.

其中一個環節係兩個小朋友一組, 由於得5個, 所以淨番我陪家希自己一個人玩晒. 哈哈~~

已經Releax左, 仲好認真咁玩, 而mama 我終於可以離一離身影吓相.

終導師姨姨要求每個小朋友坐係凳仔度玩, 等佢地可以弧底身拎波仔之後放落個筒度. 不過家希玩玩都係覺得企起身會順手d.

玩玩吓, 居然比家希發現張凳有個窿, 可以放d波入去.

1個鐘頭既課程話咁快就完, 家希屬慢熱小朋友, 好似唔似, 似足mama 細個時一樣添. 佢好留意四周, 係因為佢要睇定d, 响安全環境下就放心去玩.

可能我一心都打算join 呢間, 所以試完就即去報名, 100蚊試堂費可以係個課程扣番. 預計5月開班. 而家希呢個時候都肯玩吓四周既玩具.