【閒遊星期六日】

唔駛返 Playgroup既禮拜六日係最多時間淨, 連續兩日家希倒塌咁早就起身.
咁早起身拿拿林做好家務就帶家希落街食早餐, 順便去埋公園玩.
今日熱到爆, 想搵個唔曬既公園都咁難. 仲諗住咁早, 又咁熱, 所以防蚊措施完全無做到, 點知去到呢個近屋企既公園, 鬼死咁多細細粒既蚊滋.搞到 Mama 我即刻折返屋企做番防蚊措施先.

大過仔, 唔駛扶, 已經可以自己企上去. 叻叻 !!

見頭先個公園咁多蚊滋, 都係轉場為佳, 兜左好幾個公園. 最終見呢度有千秋就留係度玩, 上次方 Sir 話呢類千秋少之有少. 可以好好比佢地練下平衡力, 要好好珍惜.

唔知係咪時間倘早, 平時呢個公園最多大小朋友, 居然今日得我地倆母子玩晒.

家希係方Sir度玩過, 唔再驚千秋, 細細力推下, 比佢感受吓d 離心力.
睇佢曬到雙眼都曚晒 !!


玩左幾轉滑梯, 家希忽然鬧情緒, 不停話 "唔玩" "唔玩" "唔玩"

睇佢個樣幾咁唔耐煩, 搞到好似係 Mama 我唔願走咁, 最後仲開口叫 Mama 我走 !


沿路返屋企, 家希就好似播錄音帶咁, "唔玩" "唔玩" "唔玩", 返到屋企問口仲扭計唔肯入屋, 好言相勸, 就越扭越厲害, 真係搞到 Mama 我發火至識停, 沖完涼灘係梳化,佢對眼已經味下味下.

禮拜日, 又係例排落街食早餐, 多左嘢講既家希, 係餐廳口不停, 食飽我地又打算去公園吹Bubble, 點知路經籃球場, 家希死都唔肯走. 連吹泡泡都唔玩.
梗係啦, 平時遠遠隔住個鐵絲網望住個球場, 家希雙眼已經發晒光, 係咁話射波波.

Papa 唯有返上樓拎個波落黎啦~

睇佢真係似模似樣, 仲露低添!!


雖然個籃球架咁高, 家希得個丁屎咁細粒又點會射到呀! 但佢都無放棄, 不停追呀, 不停掟呀!
準備入灌 !! 哈哈 ~

 

 

 

Papa 仲比家希騎膀馬去射籃.

玩左半個幾鐘, 呢條友仔應該攰喇, 仲O益住要返屋企.