【復活節第一擊 の 深圳野生動物園】

落左成個禮拜雨, 真係好悶囉. 
復活節第1日, 一早安排北上.

擔心左成個禮拜, 今朝起身, 天公造美, 雖然唔係咩陽光普照. 起碼無雨, 已經心滿意足.

9點9 食早餐, 10點3出發去深圳灣過關. 從未見過呢個關口咁多人. 真係好嚇人.

幾經辛苦過到關, 又要再排隊等的士.

4個字車程, 30幾蚊人仔.

最後搞到差唔多12點至到達.

今次係我第一次團購.
原本都無打算團購, 但個價錢真係差好遠, 98蚊港幣 VS 200蚊人仔.

唔夠120CM, 唔駛錢入場.  所以我地一家3口只係團購左2張98蚊入場劵

我地倆公婆係08年都黎過.. 其實都幾多嘢睇.好豐富.
相隔左5年, 估唔到呢度反新左. 四周圍都好乾淨. 同D 動物既距隔近左.

白色既孔雀, 呢度有好多. 仲差唔多隻隻都開晒, 好靚.

馬騮. 反新後, 用左個玻璃屏風隔住.

呢隻唔記得係咩動物, 近到我差唔多可以掂到佢.

長頸鹿既新居, 興建中.

駱駝, 點止得呢3隻咁少.

終於見到長頸鹿,可以餵佢食草. 20蚊1個人, 細路仔唔駛錢.

家希又要餵又要驚.  

睇番D 相, Papa 似搵家希做擋箭牌咁喎. 

三兩下,  d 草就比長頸鹿搶左黎食.



再向前行.  又見到大象.
10蚊份既香蕉+紅羅白.

講真, 三兩下手勢, 都餵晒喇.
好彩, Mama 我早有準備, 自備2梳蕉
咁樣佢地就可以餵番夠本.

對面就係斑馬.
20蚊一大扎草. 呢度個ee 好好人. 仲拎左2支紅羅白比佢地餵.

河馬. 呢d 動物真係响香港無乜機會會見到.

最開心係. 呢度無乜人. 我地3大2細, 好似包場咁.
影相最開心. 完全無路人甲阻住. 哈哈~

哇! 睇下幾多魚



咪係呢2個細路餵緊佢地.
其實仲有天鵝, 不過無影佢地.



身背後就係所謂愛情湖喎


呢隻蒙古馬仔. 又係20蚊. 可以騎一個圈.
家希唔知係咪好緊張, 對腳硬晒咁. 好搞笑.

大象. 一場黎度. 都試下上去騎下喇.

傻仔可能唔知發生咩事, 比大象卷起. 只係呆呆咁既樣.

講真, 呢度真係幾大下.
佢有觀光車或者馬車坐.

但我地選擇自己行.
咁樣可以咩動物都睇得清楚.

鱷魚池. 真個d 好懶洋洋, 我地淨係影隻假

呢隻小熊貓, 好得意.

又八卦, 一見我地行埋, 佢地就走埋黎.



差唔多時間要衣肚. 揀左大象餐廳.

d 餸菜都算ok. 不錯不失.


食飽, 再行前少少就係熊貓館.



呢度睇熊貓真係舒服得多.
同海洋公園相比. 想攝個位都難.

但呢度完全無阻擋.任你影.

再向前行, 有個小小兒童樂場
呢個係大陸版既撞撞車.

得佢地2個細路玩, 真係舒服得多.



呢隻車, 係香港都有得玩喇.
不過家希死都要玩, 唉!! 算啦, 比佢玩一個Round.

呢d 車都幾肉酸.

去到d 雀烏區. 幾似香港動值物公園咁. 一個一個大鐵籠

唔經唔覺, 去到猛獸區.

最刺激一關.
呢架就係我地準備入虎穴既車.

50蚊位, 細路仔又係唔駛錢.

最初得我地5個人咋.
點知一開車, 個工作人員就係咁向街上既人咁係推介.
最後我地由5個人變左14個人喇



其實我地個個都好驚. 真係要入虎穴, 勁近距離接觸.

哇!! 老虎隻手真係好好好大. 淨係隻指甲都等於我隻手指咁粗.


工作人員向我地每人派左支叉雞扒既鐵叉. 好似BBQ 既Feel.
哇! 成隻咁博埋黎. 佢d 口水呀!!!
前前後後可以餵2次.

成個過程, 都幾好玩, 真係無乜機會可以咁近距離.

驚既話, 唔坐車都一樣可以餵老虎, 只需10蚊餵1次.



餵完老虎, 我地又去餵大灰熊.
佢地一樣好大隻. 第1次見. 真係大開眼界.

10蚊一兜蕃薯. 掟親, 佢地必會接到, 勁呀!!

其實仲有幾個表演Show. 不過時間夾唔啱, 最後只係夾到時間, 去睇海洋表演.
但呢個表演, 睇人跳水過海豚同海獅囉.
比較悶, 同海洋公園個d. 真係蚊比同牛比.


中途仲邀請嘉賓去同海豚握握手.

其實, 睇表演係其次.
真正目的, 係完左Show後, 可以同海獅影相. 一樣又係20蚊.

講真, 真係無乜機會可以同海獅握手. 呢度可以咁做,真係好難得.

距離6點半閂門時間仲有半個鐘. 我地去埋bb區.
小豬o麥. 好得意.

唔知呢隻羊點解會走左出黎.

我地用淨低既紅羅白餵下佢.

原來呢個動物園一樣有年咭, 乜大陸都咁in 架嗎.

沿路都有呢d 假石像.
總結, 呢個動物園值得再黎多次. 見到佢仲有d 機動遊戲試驗中. 用團購呢個價錢係抵玩.



玩左6個鐘.  返香港食完晚餐又去食Yugo.

永遠見親家希個食相都好搞笑.