◣我家◕｡◕じ寶貝◥: 【2歲前大回顧】

【1歲零1個月】

仲未識行既家希, 不過已經可以隔中離手企hold 到幾秒.

脾氣越黎越衰, 唔比掂既嘢, 佢死都要掂, 左手唔得就右手, 所以要同佢鬥快, 最後都掂唔到就發難, 大大叫尖叫撜拍枱拍地 poon 口水甚至掟嘢. 咁細既人仔, 脾氣差到爆, 睇黎佢遲早會激死我.

依然咁為食, 又係隔壁飯香個隻. 自上個月病後, 家希就一直瘦猛猛, 骨燦燦, 睇黎佢個身型都唔會係肥仔size.

唔知係咪開始有厭粥期, 見粥即走, 咁又係既…..

早午晚三餐都係粥, 係人都癲, 開始早奶後個餐轉麥皮. 其實仲有咩選擇好呢 ? 唔知其它blog友既bb又會食d乜架 ?

瞓覺仲可以keep住每日2次晏覺, 每次個幾2個鐘. 仍然保持每晚9-10點上床瞓覺, 但每晚半夜1點後, 就會ee丫丫, 一係趺奶咀一係就口乾, 唔知點解成晚可以係床到碌黎碌去, 好似滾球咁, 搞解連mama 都無覺好瞓. 真攰死mama !!

換片片開始有好轉, 應該明白換片片既意思, 有陣時都肯乖乖就範.

仲係得8隻牙仔, 開始係沖涼時, 比支牙刷佢刷吓, 有陣時叫佢E係棚牙, 佢都肯.

【1歲零2個月】

顯佢比以前扶住嘢黎企得耐左, 穩陣左. 仲成日扯住我地要帶佢行路. 家希又學左就嘢, 識得禽上梳化, 禽上茶几, 睇少陣都唔得. 但識上唔識落. 片片M碼不變, 有陣時個腰圍仲鬆鬆, 唔通要轉番去 S 碼. 唔係呱 ??!!

第9 同第10隻牙爆緊出黎. 尖尖既牙仔好明顯凸左少少出黎, 成日拎住張被係咁咬係咁扯. 至驚佢會扯傷d牙咋.

【1歲零3個月】
十五個月既家希, 自上個月家希搬去婆婆家住後, 學嘢快左.

可能婆婆日日帶家希落街街, 又見得多人, 又多小朋友. 家希就係最鐘意眼甘甘昅住其它小朋友既一舉一動.

只不過响婆婆住左1個禮拜都唔駛, 一話拜拜就識得舉起手向你fingfing. 仲要係lift度無拿拿同其它人fing fing手, 真好笑 !!

講飛飛飛, 家希就識得張開手, 講點虫虫, 就識得用2隻手指篤住. 呢d我教左好耐, 佢都學唔到. 反而多得婆婆d街坊.

【1歲零4個月】

計計手指仲有2個月就歲半. 單字仲未可以講到, 仲係成日Da da 聲,最叻都係扭計喊喊時叫 Mun mun.

苦練左成個月, 家希終於可以放手行. 雖然有D搖搖擺擺, 但都係個好開始.

牙仔進展唔錯, 由7個幾月起, d 牙就係咁標, 標到10個月就停左抖一抖, keep 住8隻牙仔去到15個月又再標過.

呢頭上排標完2隻側牙, 個頭上上下下左右4隻臼齒齊齊出. 隻臼齒真係好大隻, 唔怪得知家希牙痕得好厲害, 差唔多想塞晒成個拳頭入個口. 接住下側牙又標緊出黎, 而家仲淨最後個4隻臼齒未出現. 好似要等到2歲後至標. 唔駛幾耐, 成掤20隻牙就會出晒.

【1歲零5個月】

17個月家希, 開始要自己畢野食.

之前我仲以為佢當玩具咁玩, 原來佢真係可以畢到入口食. 但總會食周身都係, 好彩我一早準備左d 大大條既口水肩.

自己一路食緊排骨飯一路睇電視.

【1歲零6個月】
歲半既的確係大過仔.

已經聽得明我地講d乜仲會做.

舉手, BYE BYE, 飛吻, 錫錫, dom 腳, 坐低, 對腳擺番好, 閂門, 前面後面. 除衫, 洗手, 卒手, 暫時諗起呢d.

成日都講嘢, 都係BB 話, 仲識得投訴, 真係有文有路咁.

上個月仲講緊次次係婆婆家探完要走都喊到拆天, 隔左1個月, 真係大過仔喇, 唔再喊, 會揮手BYE BYE同閂門.

飲食都無變, 一樣係為食貓.

【1歲零7個月】
19個月既家希. 其實大至上都差不多. 最令 Mama 我好頭痕, 莫過佢D 脾氣, 成日都諗點解呢個小朋友咁難搞. 係咪個個小朋友都係咁啫, 但又唔多覺. 睇黎Mama 我又或者要帶家希上下堂, 真係有陣時 Mama 我好嬲下.

帶家希出去食Tea,家希見隔壁位既哥哥仔飲緊檸茶, 就手指指, 我話佢知係哥哥架, 唔係我地. 佢就即係企身係度揼腳, 係咁吾吾吾, 好明顯佢發緊忟憎.

講嘢方面, 而家佢最叻就係講 "Da 謝" , 尢其拎住佢最想食既嘢, 佢會連環Da 謝Da 謝Da 謝Da 謝, 好搞笑.
問親佢好唔好, 得唔得, 佢成日都話 "吾米" , "吾Da" , 話佢曳曳, 佢應我打打. 同佢話無呀, 佢識得隻手反起, "無丫"...

【1歲零8個月】

20個月大既家希, 1 日3 餐200ML奶, 無走雞, 好彩佢仲鐘意飲奶奶咋. 肯自己渣住支奶啜, 飲到夠, 就擰頭再推開支奶.

今日試吓叫家希自己瞓係度飲奶奶, Mama 我就去沖涼. 頭5分鐘都ok 架, 不過最後都係喊住渣住淨番1/3支奶去廁所門叫我.

仲有4個月就2歲, 家希仲係日啜夜啜個奶滋, 真醜死怪, 要滴起心肝同佢戒戒戒, 希望成功啦.

戒片仲未成功, 應該話仲未成功肯去尿兜度屙, 不過當屙左吾吾, 識得走埋黎揭起件衫,示意屙左.

片片由M 碼終轉 L 碼啦.

而家沖涼已經唔再用盤, 皆因Mama 我想快手快腳沖完就算, 唔想佢浸太耐水, 呢個家希已經適應左, 每次同佢講去沖涼好無. 佢會點頭放低手頭既嘢, 走去廁所門等我.

講嘢方面, 我懷疑家希有D內歛怕羞, 所以一直都唔肯講Papa Mama 婆婆.
近日多左新字, "Da 住" (音:渣住), 哎丫.

仲記得第 9 堂既PG, 要小朋友啜住支飲管吹, 個陣家希未識吹, 相隔左 2 月, 唔知幾時家希就學識左, 一有嘢食, 呢個心急仔就好候禽, 又驚會熱親佢個咀, 我都會同家希講, 吹吹先, 點知佢真係O都起個咀...呼, 係有風架. 唔係做作架. 真叻仔.

呢輪婆婆開兒童台比家希睇, 呢個小朋友一路睇一路拍手, 一起音樂佢就成個人彈起, 舉高扭黎扭去, 仲好有節奏, 真係好好笑 !
而Mama 我都有兒童台, 用手機拍完再逐格整番張相出黎.

教左家希1次玩呢架搖控車, 就已經識玩, 真叻仔.

【1歲零9個月】

21個月家希, 真係覺得佢每日叻過一日.

大早幾個月, 家希已經識得屙左吾吾會叫我地, 示意要洗 Pat Pat. 婆婆仲話家希有幾次要O殊O殊, 會走去婆婆臉前再指指褲, 之後除片片係廁所O殊左出黎.

幾日無落街, 家希會心情差, 扭計多都唔止, 仲會走去拉架BB車出黎同拎對鞋仔比你, 叫你同佢去街.

而家識得鬧情緒. 知道你話佢, 佢會唔鐘意, 會睥住你又或都臉色會一沉, 嬲嬲地咁既樣.
又唔知係邊度學番黎, 扭計喊,仲用個背脊"得"住我,臉向牆, 細細聲咁喊, 搞到我有D驚. 點解咁細個小朋友會識得咁樣.

戒奶咀可算成功, 閒時可以唔再啜, 不過夜晚瞓覺個Round都要啜住入睡.

歲幾既小朋友,真係唔蠢得晒, 唔夠高, 識得去拎張凳仔, 禽高拎佢想要既嘢.認知方面:
叫佢轉圈,舉手都做到, 呢排仲教家希,一聲到"到"就要舉手.
問佢耳仔, 咀咀, 鼻鼻, 眼睛, 腳仔, 肚池, 佢都可以指比你睇.

講嘢方面:
終於識叫mama, 不過佢叫到好似mon mon 咁囉. 新學識叫EE, 婆婆對面屋既EE一返, 家希就即行埋鐵閘到叫EE, 屋企有隻招財貓, 教左佢一次, 叫貓貓, 就已經識叫, 仲係D寵物店見到貓, 知道個D係貓貓, 仲日叫貓貓添, 成日周屋摷D嘢比你, 叫你渣住渣住. 英文字母, 識講B,D, E, O.
搵唔到嘢, 會話無丫, 唔丫. 問佢知唔知,好唔好, 得唔得, 佢係咪都答我知丫得丫.

【1歲零10個月】
22個月了, 唔駛幾耐呢個小朋友就2歲. 相信佢已經踏入呢個 Trouble Two. 一直最困擾 Mama 我係佢d 脾氣. 次次硬係要做一d唔可以做既嘢, 明係測試我地個底線.

上回同陳姑娘傾完計後, Mama 我開始另一策略, 盡量唔再講唔得, 唔好, 唔可以.不過慶起上黎都幾難做得到.

呢輪家希多左嘢講, 最得人驚, 連瞓覺都無拿拿坐起身, 講一大輪嘢, 有文有路咁架, 之後就瞓番低再瞓, 嚇屎人.

家希終於肯開口叫婆婆喇 ! 婆婆仲話佢閒時係屋企,個口唔係不停咁食嘢就不停咁講嘢.

呢個Weekend, Mama 終於見識到啦, 家希會無拿拿好似練習咁, 講: ee, 伯伯, papa, mama, 婆婆,a,b,c,d,e, 阿支(奶咀),車車, 波波. 好搞笑.

行路已經好穩, 仲成日想走, 即係比行既速度加快咁. 禽禽青咁囉. 識路都幾勁呀, 帶過家希行一次, 下次再行過佢記得點行, 邊度有貓貓,邊有得有玩彈波機.

有陣時係人地d玩具舖玩到唔願走, 同佢講byebye, 佢夠膽死真係向你揮手講bye bye.

家希次次要Mama papa 個電話, 都會雙手拍落自己個耳仔度, 而家Mama 我教識家希講, 果個d i-phone, 不過個傻豬叫到 i-fu.

睇佢玩電話真係玩得入神入格. 仲記得d相同d片放係邊個Folder. 仲識得自己開貓貓黎玩.