上個禮拜, 一個簡單既Whatapps. 就拉起今次大家既Gathering,
今次我地揀左野餐, 老實講, 真係擔心左成個禮拜囉. 見個天咁落雨法.
原本唸住近近地去沙田中央公園, 老公又話野餐梗係去好箂塢個果大草坡啦, 不過又驚 Blog友們會唔會嫌遠得濟. 幸運地, 佢地個個都OK 咋.
家希呢個仔, 真係快要比佢激到我嘔血. 原本路途中都仲好期待, 好Happy, 點知一去到, 就即刻180度變. 情緒化得佢. 仲爆喊, 唉 !! 又要Mama 我係Blog 友們出醜鬧仔, 你話幾肉酸, 點解唔可以好似其它小朋友咁乖架佢. 係咪想我入瘋人院至安樂.
等齊人, 黎番張合照先, 要幾個細路合合作作坐埋一齊影, 真係向高難度挑戰架.
嘻嘻! 不過我鐘意挑戰.
佢地都已經3歲喇, 大家只不過都係相差幾個月, 所以呢個歲數對佢地黎講都啱玩之餘又明白我地既指示.
一問佢地, 邊個係3歲, 個個舉晒手. 連細佬仔靖堯都舉埋一份.
呢張相仲有人話佢地似流星花園D 主角喎. 好搞笑 !
連環狂影, 澄澄無拿拿鬧情緒唔影.
不過呢張既效果都唔錯喎.
黎得野餐, 食物都好重要, 我地每人負責少少.
成地都係.
又點少得小朋友既玩意.
波真係唔少得.
汽球又係個個小朋友至愛.
傻仔嘗試自己吹, 睇佢吹到成塊臉都賬卜卜.
Bubble 都一樣不少得. 估唔到帶黎既Bubble 可以全部用晒, 勁呀!!
咁上下時間, 要集齊人一齊開餐先.
今日就比佢地放肆一次咁多囉.
家希帶頭話要乾杯喎.
Jacki 都唔少得.
食飽, 小朋友又四散, 我地幾個媽咪聚埋吹下水先. 大家交流下湊仔經.
突然呢個仔又燥起上黎, 自己倒瀉Bubble 就 Be Lee Ba La.
又咪係大發皮四.
哎呀!! 點解佢既脾氣臭成咁. 我真係想搵窿匿埋囉.
平靜過後, (( 當然又要我發火罵仔啦. ))
轉一轉地方影相先. 呢個景必影.
呢張相, 我覺得好有Feel, 睇佢地5個, 各人擺出自己既姿勢. 好生動.
等我晒大佢放係屋企都好喎.
5小福轉過頭變左3個小靈精.
究竟佢地係度o翁乜 ?
咪就係各有各唱歌囉.
又再次挑起我把火, 三分鐘唔夠又一穫, 睇黎似要迫我去到人格分裂咁.
Jacki仔唱巴士歌, 我家既小霸王要唱Happy Birthday. 真係因為咁, 又大發雷霆, 仲郁手打人.
真係嬲到我震之餘, 仲勁之唔好意思.
點解家希曳得咁緊要, 平時都唔會郁手, 而家野蠻到動手.
最後收場, 咪要Mama 我再次再次出醜罵仔, 佢就爆喊. 我就激心.
大家冷靜過後. 係時候執嘢走.
睇下個衰仔個樣, Cool 爆, 咪因為比我涮完囉.
每人一個戰利品.
可惜今次字正媽 Join 唔到，希望下次愉景灣舀沙之約會可以Join 到啦．
離開前, 發現喜羊羊已經入侵左奇妙世界. 有佔一個Window窗既位置.
老公見靖恩媽佢地一家大細, 又2架車仔. 加幾袋嘢.
提議兜佢地去欣澳站.
而我又有機會埋去石霸度影下相.
家希為何咁既樣, 咪話太陽猛猛囉.
呢度個View 好靚. 望住個大海, 好舒服.
沒有留言:
發佈留言