【小肌肉訓練】

食過早點, 搵d嘢比家希玩吓,

摷左我d 寶貝出黎. 記得係PG 度都有玩過呢D嘢, 比個兜仔佢, 一粒一粒咁放過去.

【婆婆出埠 の 接機篇】

上完PG, 拿拿林攞車向機場出發, 途中買左杯YOGA, 想同家希一齊Share, 佢不知幾鐘意, 食完一啖又一啖. 

【歲半水豆針】

由家希踏入1歲開始, 已經打算同家希打番支水豆針, 不過遲遲未有時間, 而婆婆又唔贊成, 皆因佢話好人好姐, 又無事無干, 為咩要捱一針喎.

所以趁放婆婆出Trip, 就拿拿林帶家希去打番支水豆針.

家希大個仔喇, 見到支針就知咩事, 想逃走, 醫生快快手拮落去, "蚊" 番支針出黎, 家希就收聲. 真係鬆一口氣.

之後去衣肚, 成朝 Mama我咩都未落肚, 咪因為要服侍呢個大少囉.

【新相機】

一向好鐘意影相既我，去親邊, 都會影一餐.

無論以前貓貓地又好, 又或者今時今日有左小朋友都好, 一得閒無聊就會影影影.

本身個部係 Canon, 我好鐘意呢部機, 個mon又勁夠大, 不過要影郁黎郁去既家希, 一定差少少, 要影幾廿張至有1,2張得OK.

單鏡機影就一定GOOD, 不過又嫌大部, 拎出拎入好唔方便.

朋友仔又買左呢部機, 影出黎既相就係靚好多, 快門好快, 影郁黎郁去既家希都無問題. 連夜景都好靚, 傻瓜機 Canon 影夜景就差左d. 所以次次影完都要係電腦到執相.

最後氹左老公資助我一半. 哈哈 ~ 最後得手左.

【婆婆出埠 の 送機篇】

終於到左 Mama 我放大假湊B 日子喇~

婆婆要返老家十日, 有舅父仔同舅母相伴.

3人同行, 5件行李, 其中一O急係廿斤菜, 另外一箱+一O急全都係冬菇, 詎記餅.

呢次出Trip, 目的係當地表妹結婚, 原本我地一家三口都 Join, 但老公唔贊成, 又話家希太細喎. 我地辛苦時佢又辛苦. 

【煮飯仔】

早排見到blog 友講開煮飯仔, 摷番d玩具, 比家希開始玩吓. 教吓佢點切.

但佢似付對我將d食物放晒係佢個寶貝兜到會開心d.

【向迪士尼出發】

Mama 我放十日大假, 原本打算過大海玩2日1夜, 可惜留意個天文台成個禮拜, 天公不造美, 唯有放棄, 都係遲吓預埋婆婆一齊去, 化算D, 多人住一間房, 抵D丫嘛.

Papa 照攞日假, 見一早起身有太陽無雨, 雖然唔係籃天白雲, 陰陰天咪仲好, 唔想曬到成隻熱狗.
準備好一壺粥2餐奶 (其一餐Back up), 就向迪士尼出發.
搭輕鐵轉機場巴士去到收費亭再轉 R8, 全程9個字. 仲快過返工囉.
家希一見到個水池就沖埋去, 佢好鐘意水, 而Mama 我就可以成機試埋部新相機.